L'escòla Calandreta deu Lís qu'ei ...
Ua escòla associativa e laïca, devath contracte dab l'Estat. Que s'i ensenha en occitan - biarnés de la vath d'Aussau. Los mainats que cercan, que cooperan e que decideishen per e tà eths quites.
L'immersion en occitan de la vath d'Aussau, en practica...
A la Calandreta, lo bearnés n'ei pas ua matèria de mei : qu'ei la lenga de comunicacion de l'escòla. Que comptam, que legem, que desbatem, qu'inventam e que cantam en bearnés. La lenga qu'ei a l'encòp l'utís e l'objècte de l'aprentissatge. L'occitan que serveish de palanca de cap tau francés per estudiar l'ortografia e la sintaxa.
Lo francés qu'arriba chic a chic a partir de la fin deu CP. A la fin de l'escòla elementària, los mainats que legeishen, qu'escriven e que parlan las duas lengas. Los programas que son los de l'Educacion nacionala mes dab ua lenga en mei. Las duas lengas que son estudiadas en palancas linguisticas.
Las familhas ne parlan pas forçadament occitan. La màger part deus parents ne parlan pas aquera lenga abans d'arribar, e cèrts que l'aprenen en medish temps com lo lor mainat. Cèrts que parlan d'un biais evident. Los regents que desvolòpan utís de comunicacion entre l'escòla e l'ostau per ajudar a la compreneson e a la valorizacion de l'occitan dens las familhas. Los parents que vàden actors d'aquera lenga tot au long de l'escolaritat deu lor mainat.
Un sol cervèth - Duas lengas - per anar de cap tà d'autas lengas e culturas deu monde
Apréner de d'òra dens duas lengas que hè tribalhar l'atencion e la memòria. Lo mainat que s'acostuma a passar d'un sistèma a l'aute e a causir los sons mots. Aquera gimnastica que'u servirà entà totas las lengas qui encontrarà arron mes tanben per entrar dens la lenga de las matematicas, dens la musica e per tot sistèma complèxe qui demandia ua immersion.
La paur mei correnta de las familhas qu'ei la confusion enter las lengas. N'i a pas nada rason de's pausar. Los mainats que destrian las lengas plan com cau e que s'adaptan a cada situacion. Lo francés, qui ei pertot a l'entorn, n'ei pas jamei en dangèr. Au contra, la practica d'ua auta lenga latina, qu'ahorteish ua mei bona compreneson e aplicacion de l'estudi de la lenga francesa.
La Pedagogia Calandreta : la classa cooperativa occitana
La Pedagogia Intitucionau, eishuda de las ideias de Celestin Freinet, qu'ei la basa de la Pedagogia de l'escòla Calandreta deu Lís. Qu'aprenem en tot har. Que vivem çò qui aprenem. Que manipulam nocions d'aprenedissatge. Que tornam investir concretament çò qui aprenem. Que recercam. Qu'experimentam amassas. S'enganar que hè avançar. Tot progrès qu'ei valorat.
De cap tà l'autonomia
La classa que tribalha en equipa, sovent sus plans de tribalh, dab amassadas, presas de decisions e accions decididas amassas. Cadun que sap çò qui deu har, que dispausa deu son plan de tribalh e qu'avança au son ritme. Que passam cintas de color (sistèma d'avaloracion) quan e'ns sentim prest-a-s.
La cooperacion, la nosta vita vitanta
Dens las nostas classas multi-nivèus, l'enterajuda que hè partida de la vita vitanta. Que's hè entre los mainats d'atges diferents a cada còp que i a un projècte, un talhèr, lo casau, la correspondéncia, los suenhs aus animaus de l'escòla... Mes tanben e mei que tot au moment deus entrainaments de las nocions d'aprenedissatges o de las aprestanças au passatge de las cintas. Los mainats que s'explican leçons, exercicis e que's hèn revisar abans las espròvas.
Lo Conselh de classa
Las règlas de la classa, los projèctes e los conflictes que's discuteishen au Conselh. Las decisions que's prenen amassa e que valen entà tots, adultes comprés. Que podem criticar e felicitar. Que podem informar, demandar e tanben proposar. Qu'ei lo noste utís de regulacion deu "Víver amassas". Que son los mainats qui asseguran los pòstes de Presidéncia e de Secretariat.
Crear per reinvestir dab plasèr
Los projèctes que son los supòrts de reinvestiment de totas las matèrias tribalhadas en transversalitat. Lo teatre, la dança, la musica, lo casau, las sortidas scientificas de terrenh, las visitas istoricas, las visitas artisticas, las creacions de classa, los randoleis a pè o a bicicleta, ... au truvèrs de totas las sasons e tots los mitants, tot au long de l'annada, dens lo noste environament pròche com mei luenh. La vita vitanta — lo repeish, lo casau pedagogic, ua sortida, ua correspondéncia — que vàden la matèria purmèra deus aprenedissatges. Cada an los Calandrons que se'n van en classa descobèrta.
Avalorar shens classar : las CINTAS
Dens cada mestior, los escolans qu'an ua color per maine segon las espròvas qui an passat. Que's pòden entrainar abans los passatges de cinta sols o a mantuns. Cada mainat qu'ei mèste deu son camin de cinta e qu'ei eth-era qui sap quan ei qui ei prest-a per passar ua espròva. Los progrès que son seguits per colors, acompanhadas deus critèris de cintas (qui son los critèris d'acquesicion de fin de cicle de l'Educacion Nacionau adicionats deus critèris occitans e de tot çò qui hè sens dens la classa). Las colors que dísen on n'ei lo mainat dens los sons aprenedissatges. Lo mainat que lei eth quite lo son percors e que's compara a eth e non pas aus autes. Ne i a pas nada nòta, ni nat classament. Per exemple, que podem estar "Vert clar" en espòrt (çò qui correspon au debut de CE2) e "Vriulet clar" en matematicas (haut o baish CM1). Que ns'arretrobaram dab mainats deu medish nivèu per tribalhar e ne s'averjaram pas.
La nosta escòla qu'ei laïca, associativa, ubèrta e participativa
La Calandreta qu'ei ua escòla associativa e laïca, devath contracte dab l'Estat. Los regents que son pagats per l'Educacion Nacionala. Ua petita participacion financèra qu'ei demandada a las familhas entà ajudar a pagar lo salari de l'ajuda mairau. L'associacion que paga tanben lo material pedagogic e tot çò qui ei necessari a la realizacion deus projèctes de classa mercés a las cotizacions, los dons, las hèstas, las ventas de sostien e tot çò qui's pòt inventar collectivament.
Las familhas ne son pas clientas : que hèn partida de l'escòla e que i participan grandament. Los parents que pòden estar sollicitats per las lors competéncias pedagogicas a viéner en classa. Qu'acompanhan las sortidas escolaras. Que hèn proposicions. L'utís de decision qu'ei lo Conselh d'Administracion. Com tota associacion, que i a un burèu. Que s'i tien ua amassada generala, que decidim amassas, que balham la man.
Ua lenga, ua cultura, qui víven adarron de nosaute-a-s
Lo bearnés qui parlan los mainats qu'ei lo deu país, la vath d'Aussau : lo deus vesins, deus cants, deus condes, deus libes e de las hèstas. L'escòla que hè víver aquera cultura uei, en cantar, en jogar, en encontrar los qui la parlan enqüèra cada dia, en tot crear dab la musica de la lenga. Qu'ei en tot mestrejar lo noste dialècte biarnés qui podem tanben estar en ligam dab tots los autes dialèctes occitans e las lengas latinas. Qu'ei ua alandada.
Enveja de véder tot aquò en realitat ?
Ua visita que vau mei qu'ua pagina de site.