Ua escòla on cream
La creacion, la musica, la dança e la canta que traucan la pedagogia. Los mainats qu'escriven lo lor jornau, qu'escambian dab los lors correspondents e que's tròban dens talhèrs partatjats entre las duas classas.
Lo Lís, en Bearn — a quauquas minutas de Pau, de Lordas, entre Nai e Arudi
Ua petita escòla on los mainats creishen en immersion en biarnés e dab ua pedagogia activa
Au pè de las montanhas, en vath d'Aussau, los mainats, de la TPS dinc au CM2, qu'aprenen en occitan, qu'estudian lo francés e d'autas lengas, que cultivan lo lor casau, que s'autò-avaloran, que s'enterajudan e que decidan amassas. La creacion, la musica, la dança e la canta que traucan la pedagogia. Escòla associativa, laïca e devath contracte dab l'Estat, respectant los programes de l'Educacion Nacionau.
L'escòla Calandreta deu Lís ... qu'ès aquò ?
L'occitan qu'ei lenga ensenhada e lenga ensenhanta
Tota la vita de l'escòla qu'ei en immersion en occitan dens la soa version biarnesa. Lo francés qu'ei introdusit progressivament de la fin deu CP enlà. Las duas lengas que s'installan l'ua au ras de l'auta. Los aprenedissatges de las duas lengas que son basats sus programes realisant palancas linguisticas qui permetan aus mainats d'estar bilingues a la fin deu lor cursus a l'escriut e a l'orau. L'occitan que serveish lo francés e reciprocament. Los mainats que son tanben mes en situacion de descobèrta de mantuas autas lengas dab lo programe "Familhas de lengas".
Ua pedagogia on decidim amassas e on nse vedem vàder grans
Conselh de classa - Los Mestièrs - Los Talhèrs partatjats interclassa - Los fichièrs individuaus d'entrainament - lo Jornau - La Correspondéncia - Las avaloracions en Cintas on nse vedem vàder grans en color e non pas en nòtas o en classament. Aciu quauques compausantas de la Pedagogia Calandreta. Tota l'enterajuda, lo tribalh en transversalitat, l'aprenedissatge per l'experiéncia, lo tribalh cooperatiu conbinat a l'espiar deus professionaus sus cada mainat, que hèn lo hons de la pedagogia aplicada dens la nosta escòla. Los mainats que's veden vàder grans e que son mèstes deus lors aprenedissatges.
Ua escòla rurau deu casau pedagogic a l'assieta de la cantina
La cantinièra qu'apresta los repeishs a l'escòla mercés a la cosina equipada e aus locaus de la Mairia deu Lís. La Comission Cantina Associativa de l'escòla que gereish los menuts e los aprovisonaments. Los repeishs que son a 95% biologics. Lo ligam entre çò qui minjam e çò qui cultivam qu'ei abordat tot au long de l'annada en classa. Los mainats que hèn l'òrt per observar la natura e lo casau segon las sasons, alimentar las recetas de cosina mes tanben hornir quauques legumes tà la cantina. Petits e grans que manipulan las granas, los semís e qu'amassan dab gran plasèr los legumes e la fruta deu lor tribalh. L'escòla que n'aprofieita tanben per sortir sovent peu vilatge, dens la seuva, a bicicleta o a pè per estudiar tanben dehòra.
Ua escòla portada per las soas familhas
La Calandreta deu Lís qu'ei ua escòla associativa : shens los sons aderents, n'existiré pas. Comissions (coma la de la cantina), hèstas, vendas de sostien, tribalhs, acompanhament de las sortidas : arrés n'ei obligat de tot har, mes cadun que hè quauquarren.
L'escòla en quauques chifras
Los CALANDRONS : entre 20 e 30 escolans
dens tota l'escòla
Ua equipa pedagogica qui hè còrda : 2 regents, 1 ajuda-mairau
cada classa qu'a lo son regent e los regents que tribalhan amassas
TPS → CM2 dab 2 classas
Tots los nivèus sus un sol lòc.
Entre 40 e 60 aderents
Ua vita associativa hòrta deus sons aderents shens qui l'escòla n'existiré pas
Entà compréner miélher, lo mei simple qu'ei de possar la pòrta
Que vs'arcuelhem, que passatz un moment dens las classas, que pausatz totas las vòstas questions. Nada familha n'a pas besonh de parlar biarnés per inscríver lo mainat : la màger part deus parents ne parlavan pas occitan abans d'arribar. Contactatz-nos e çà-vietz passar un moment en classa, non sia que per curiosèr.
Juntar-nos
- Adreça
- Escòla Calandreta deu Lís
16 chemin du bourg
64260 Lys - Telefone
- 06 03 71 13 23
- Corric
- cap.lis@calandreta.org
L'escòla qu'ei contractualizada dab l'Estat francés qui paga los regents. l'associacion que finança tot çò d'aute.
Lo salari de l'ajuda-mairau (qui s'aucupa tanben de la guarderia), lo materiau e los projèctes pedagogics que son finançats per l'energia associativa. Que son las hèstas, las ventas de sostien, los dons... organizats per las associacions de l'escòla qui hèn víver la Calandreta deu Lís. Qu'ei un tribalh d'equipa !
- Crompar a la botiga de sostien
- Aderir a l'associacion
- Balhar un chic de temps