Sostiéner l'escòla Calandreta deu Lís

L'Estat que paga los regents. Tot çò qui demora — lo materiau e los projèctes pedagogics, lo salari de l'ajuda-mairau — qu'ei pagat per l'associacion. Que vòu díser : per las familhas, los amics de l'escòla, los qui participan aus eveniments e per tots os qui crompan un producte venut per l'associacion de l'escòla.

On va la moneda ?

Arren de misteriós : libes, papèr, pintura, la fotocopiadera, materiau de classa, sortidas e un salari que digun mei ne paga. Lo budget qu'ei presentat cada annada a l'amassada generala, davant las familhas qui l'an pagat.

Tres faiçons d'ajudar

Crompar dens la botiga de sostien

L'escòla qu'organiza ventas gropadas : òli d'oliva bio en bidon de 5 litres, vin au moment de Nadau e autes productes segon las campanhas. Que's comanda en linha, que's paga, que's vien cuélher la comanda a l'escòla. Çò qui rapòrta l'operacion que va tot a l'escòla.

Qu'ei benlèu la faiçon mei simpla d'ajudar : que crompatz quauqu'arren qui vos cau, a un prètz corrècte, e l'escòla que i ganha.

La botiga qu'ei obèrta

Las ventas en cors e los prètz que son sus la pagina Botiga. La comanda e lo pagament que's hèn sus HelloAsso, la plataforma de pagament de las associacions.

Anar a la botiga

Aderir a l'associacion

L'associacion Calandreta André Minvielle, qui pòrta l'escòla, qu'ei obèrta mei enlà de las familhas : pairbons e mairbonas, ancians calandrons, vesins, amics de la Calandreta, monde sensibles a la sauveguarda de la lenga occitana. Aderir, qu'ei sostiéner dab sòus e aver votz a l'amassada generala.

Lo montant de la cotizacion qu'ei votat a l'amassada generala. Demandatz-nos : que vos mandaram lo bulletin d'adesion.

Demandar a aderir

Balhar un chic de temps

Qu'ei çò qui manca mei. Ua petita escòla tienguda per benevòles que viu de petitas mans regularas mei que de grans gèstes.

Tiéner un taulèr a ua hèsta o a un mercat
Balhar la man a ua jornada d'obradors o de casau
Ajudar a aprestar e a distribuir ua venta de sostien
Acompanhar ua sortida escolara
Hicar a dispausicion un saber-har : comptabilitat, bricolatge, costura, musica, informatic, animacions per la classa ...
Viéner parlar, cantar o contar en bearnés dab los mainats, har musica, parlar ua auta lenga.

Ne demoratz pas au ras ? Har conéisher l'escòla a l'entorn de vos qu'ajuda ja hèra.

Proposar ua ajuda

Que'n parlam

Ua question sus un don, ua venta, un partenariat ? Escrivètz a l'associacion, quauqu'un que vos respon.

Nos contactar