Las classas de la Calandreta deu Lís
Entre 20 e 30 mainats. Ua classa mairau de la Tota Petita Seccion dinc a la Grana Seccion. Ua classa elementària deu Cors Preparatòri au Cors Mejan 2. Ua equipa pedagogica qui pensa l'emplec deu temps de las duas classas en descantonament dab un maximum d'activitats comunas.
Duas classas, tots los atges
La GS qu'ei autant en mairau com en elementari. Atau, qu'a dejà un pè dens l'aprenedissatge de la lectura en prevision deu CP. Los mairaus, CP e CE1 que son regropats per la matèria "Questionar lo monde". çò qui permet de har sciéncias, istòria, geografia, educacion civica de faiçon aplicada dab los CE2 e CM. Per l'espòrt los CP qu'an lo plasèr de juntar la classa mairau e aquò que permet d'anar mei luenh dens la practica deus espòrts collectius e individuaus dab los CE/CM. La reparticion exacta que càmbia cada annada segon los efectius : qu'ei un avantatge de las petitas escòlas.
Lo multi-atge qu'ei ua hòrça. Los mei joens qu'aprenen en espiar los mei grans. Los mei grans qu'assolidan çò qui saben en ac explicar. E un mainat qui a besonh de mei de temps que'u pòt préner shens cambiar de classa.
La lenga, segon l'atge
En mairau
Tot que's hè en bearnés : las consignas, los jòcs, las cançons, las istòrias. Los mainats que comprenen d'abòrd, puish que's boten a parlar, com entà ua purmèra lenga. Qu'ei l'immersion.
Corrent GS e au CP
L'aprenedissatge de la lectura que's hè en occitan. A la fin de l'annada de CP, quan la lectura ei installada en occitan, lo francés escriut qu'ei introdusit devath la fòrma de practica de lectura. Lo mainat que transfereish lo son còde de lectura en occitan de cap tau còde de lectura francés e inversament. L'acquesicion de las règlas de lectura de las duas lengas que's hè hèra rapidament puishque lo mainat qu'a sovent dejà començat de léger tot çò qui a adarron eth-era.
Deu CP au CM2
Las duas lengas que víven amassas non pas sonque a l'orau mes tanben a l'escriut. Lo bilinguisme orau e escriut que's concretiza tot lo long de la classa elementària. Los mainats que tribalhan lo francés coma pertot e que contunhan de víver la classa en occitan.
Lo seguit deus progrès e l'escambi escòla/familhas
Los aprentissatges que's segueishen per colors de progrès, partatjadas dab lo mainat e la soa familha. Dus còps per an minimom, l'equipa pedagogica qu'invita los parents a rendètz-ves per har lo punt pertocant l'escolaritat deu lor mainat. Los regents que responen a las demandas de rendètz-ve autanlèu qui lo besonh e's presentia. La comunicacion per telefone a l'escòla o per mail qu'ei regulara. Au mensh dus còps per an, un RESCAMBI qu'ei organizat. Qu'ei un moment de partatge adarron la pedagogia e de çò qui's hè en classa per respóner au questionament de las familhas.
Véder ua classa en realitat
Las visitas que's hèn sus un temps de classa, quan l'escòla arcuelh mainats. Qu'ètz convidats a juntar-vos e a har part, per un temps, d'aqueste univèrs. Qu'ac partatjam dab vos.